Në Klinikën e Neurokirurgjisë shpesh i shoh pacientët tanë nëpër korridore duke pirë duhan. Pinë duhan ata që presin për operacion, por edhe të operuarit—ata që janë në gjendje të lëvizin vetë ose me ndihmën e të tjerëve.

Për ndikimin e dëmshëm të duhanit mbi shëndetin tonë, bota di prej shekujsh, ndërsa që nga viti 1964 është vërtetuar edhe statistikisht ndikimi i tij i drejtpërdrejtë në zhvillimin e tumoreve të mushkërive.

Dua t’i informoj pacientët tanë të nderuar për efektet e dëmshme të pirjes së duhanit në rezultatin e operacioneve neurokirurgjikale.
A e dini se pirja e duhanit tek pacientët neurokirurgjikalë e rrit disa herë rrezikun për komplikime perioperative? Bëhet fjalë për infeksione, shërim më të vështirë të plagëve, mosbashkim të suksesshëm të eshtrave gjatë operacioneve të shtyllës kurrizore. Duhanpirësit kanë qëndrim më të gjatë spitalor, nevojë më të madhe për operacione të përsëritura dhe shërim më të dobët krahasuar me joduhanpirësit. Veçanërisht të ndjeshëm janë pacientët me aneurizma cerebrale—duhanpirësit kanë disa herë rrezik më të lartë për plasje (rupturë) të tyre.

Prandaj, nëse e çmoni shëndetin tuaj, ndaloni pirjen e duhanit, të paktën disa ditë para dhe pas operacionit! Kthehuni më shpejt dhe më të shëndetshëm në shtëpi te më të dashurit tuaj!